S'dha dorëheqjen, Balla: Sa të përfundojë numërimi, Ilirin e nxjerrim në pension! Meta: Gati për të firmosur dekretin për mbrojtjen e Republikës dhe vdekjen e tradhtarëve

TIRANË- Ilir Meta nuk mbajti fjalën e dhënë që nëse do të fitonte Edi Rama, do të jepte dorëheqjen nga posti i presidentit dhe sot e përforcoi këtë qëndrim duke thënë se do të kthehej në LSI në 2022, kur dhe i përfundon mandati i Presidentit. Nisur nga kjo, mazhoranca do të nisë procedurat për shkarkimin e tij me Kuvendin ekzistues. Kjo procedurë do të fillojë menjëherë me përfundimin e numërimit të votave për kandidatët. Ishte vetë numri dy i PS-së, Taulant Balla që konfirmoi një fakt të tillë, duke thënë se “do i bëjnë gati letrat e pensionit”.

"Me Baba Dridhe Liken çuditen vetëm ata që s’e kuptojnë akoma që i ka lëshuar pëllumbat përfundimisht! Askush s’ka pritur të mbajë fjalën për dorëheqje! Po ja të mbarojë procesi i numërimit dhe t’ia bëjmë gati letrat e pensionit, të pijë raki me çifteli me Saliun ke azili Lalzit", ka shkruar Balla.

Shkarkimi i tij, nuk u prit mirë nga Meta, i cili tha se nuk kërcënohet nga “Tao Tao”, (duke iu referuar Taulant Ballës), e duke thënë se ka gati dekretin për mbrojtjen e Republikës dhe mjafton një firmë e tij që kjo të ndodhë. Nuk dihet saktë se çfarë ka dashur Meta të thotë, por duke iu referuar deklaratave të mëparshme për shpërndarje të parlamentit dhe tubimit të 2 marsit 2020, mund të jetë pikërisht ky veprim hapi i radhës së kreut të shtetit.

“Kërcënimi i fundit, që vjen përmes Tao Taos, nga bandat e Elbasanit dhe të gjithë Shqipërisë ka vetëm një përgjigje: Presidenti, gati për të firmosur Dekretin për mbrojtjen e Republikës!Shqipëria e Shqiptarëve!  Vdekje tradhtarëve”, tha Meta në reagimin e tij. 

Nga ana tjetër, Balla iu kundërpërgjigj sërish me ironi. 

“Likja e paska tharë që në mëngjes shishen e rakisë së dëllinjës! Tani vazhdo me kumbullën Like dhe në darkë kalo ke rrushi, se LSI-së s'ke ça i pi më! Po Elbasanin mos e kujto fare se do të duhet raki pishe pastaj”, shkroi Balla.

Kjo është hera e dytë që mazhoranca do të nisë procedurat për shkarkimin e Ilir Metës nga posti i presidentit. Herën e parë, gjithçka nisi për shkak të çdekretimit të zgjedhjeve lokale të 30 qershorit 2019. Sot, kjo procedurë ka nisur pas luftës që Meta hapi ndaj SHBA-së dhe ambasadores Yuri Kim, si edhe daljes së tij totalisht nga roli i kreut të shtetit dhe përfshirjes së tij në fushatë në shkelje të Kushtetutës, asaj që Meta përbetohet se po e mbron me gjak dhe dinjitet.

Rendit zhvillimet sipas orarit:

Të Fundit Të Parat

K.T./B.K./Shqiptarja.com

TAG:
• Ilir Meta
• taulant balla
• shkarkimi i metes
• tubim me 2 mars